L’era ‘na sira d’agost dal 2007, al Grott Torcett da Giubiasc e serom drè a bagnaa par ben la nascita dala Valeria, la seconda tosa dal Edu in arte Vitorio.
Dopo ‘na discreta dose da vin ross, per la precision al Merlot dal Marcionett da Mont Carass, el “Settemaggio“ (sembra che dopo chela sira l'é nai ai tropici par un mes...), a salta föra ‘na ghitara, la solita, chela scranscia dal Paschi (…a di la verità doveva vesig anca chela dal Sax, ma vist che ‘l doveva sta sü prest el dì dopo, l'ha pensò ben da lasala a cà…). Fatto sta che dopo un para d'or da versi, tra ‘na Verzaschina e ‘na Cavergnesa, riva scià una boteglia da vin oferta dal Toto Cavadini e… l'è partida ‘na “Jam sesion“.
Chel che l'è sucedü dopo, val disom la prosima volta o magari gal fem cüntaa sü dal Edu, che la fai ‘na bela ciciarada con dü poliziott, so presunti coleghi da lavor...
Moral dala storia, signori e signorine... l’è inscì che l’è nasuu el nos grüp di Folk & Grott.
Perché Vitorio? …ma perché a som drè a imparaa a sonaa la fisarmonica come al Castelnuovo…
Chela sira, quand sem vegnuu fö dal Grott, seri convint che serom a Bellinzona e quand i poliziott ia cominciaa la romanzina, a som nai a cuntag sü che serom coleghi da lavor, perché anca mi a lavori pal comün (azienda elettrica)… Par nosa fortüna i poliziott da Giubiasc ia seraa un öcc, forse anca dü e i ga lassaa naa.
A tirà denta nal grüp al Dea, che sona al “cajon” (‘na cassa da legn), l’è stai un atim… e con lü sem rivaa a quatro.
Vist che tüc a sonum anca in di Ciod Stonaa (guggen da Bellinzona), quand l’è ch’ em incominciaa a fa pröva da la banda, ghem cuntaa sü ai nos soci ch'em metü sü al grüp di Folk & Grott, l’è subit arivaa al Seto da Soldün che l’ha di:-“dee, dee, dee, a vegni anca mi a cantaa insema?!” … e fa cinq…
Nal giügn dal 2009, vist che nal grüp mancava ‘na tosa, l’ha cominciaa a vegnii a cantaa con nüm anca la Simo e devum propri di che, ga fai fa un salto da qualità… a bevom meno!!! … e ses…
Nal dicembar dal 2010, un soci dal Dea, al Toto Baldassari da Preonz, al s'è proponü da tacas là col contrabass.
L'idea al grüpp, la ghè sübit piasüda, ma al Toto, da üscit, n'ha fai ben pocc: al regeva mia al nos "ritmo"...
L'è però in vüna da chesti üscit che al Sem Barenco, bravo fisarmonicista ma anche müsicista polivalent, ch'el sa innamoraa dal contrabass (magg 2011).
Al Sem, da chel moment, la ciapaa al post dal Toto.
Dal 2010 al 2012, la Simo l'ha ga vüt dü fiö e, vist che la ghera quasi mai, dal novembar 2011, la cominciaa a vegnii a cantaa con nüm la Dany, nosa amisa in di Ciod Stonaa.
Attualment, a sem in vott...